Silleda, 26 de marzo de 2015.- A Feira Internacional de Galicia acollerá mañá o Spring Festival 2015, o cal reunirá á orquestra La Fórmula no que será o seu debut e tamén a outras catro formacións con importantes novidades para esta tempada, como son Gran Casino, Panamá, Alcázar e Nebraska.
Este evento, organizado por Espectáculos Che Cactus e Troula coa colaboración de Alvar Espectáculos, abrirá a súas portas ás 21:30 horas e comezará ás 22.00 horas, rematando pasadas as 06:00 horas.
O Spring Festival iniciarase cun pequeno pases de 45 minutos de Gran Casino, Panamá, Alcázar e Nebraska, aínda que a súa orde de actuación está sen concretar. Estas formacións amosarán o máis importante do seu repertorio, con novos temas, espectáculos e compoñentes.
A continuación será a quenda de La Fórmula, que fará un pase de entre unha hora e media e dúas horas na que será a súa primeira actuación. Nesta presentación os asistentes poderán coñecer o seu plantel, cunha dianteira que conta cunha destacada traxectoria en importantes orquestras, o seu espectáculo e as súas magníficas infraestruturas, como o seu escenario de 30 metros de fachada. Dende La Fórmula, Miguel Caldas destaca a “amplitude e comodidade” da ubicación do evento, mentres que en canto á súa actuación sinala que a formación, con 15 persoas encima do escenario, interpretará mañá unha parte do seu gran repertorio, a cal “se adaptará ao público que acuda”.
Ao remate de La Fórmula actuarán de novo as outras catro formacións, con pases de outros 45 minutos. Todas as orquestras e grupos contarán cos seus propios escenarios, polo que o pavillón albergará un total de cinco.
Entrada gratuíta e espazo climatizado
A entrada ao evento será gratuíta e contará con todas as comodidades que ofrece o pavillón 1 do recinto Feira Internacional de Galicia, que permitirá aos asistentes desfrutar do espectáculo nun espazo pechado de grandes dimensións e climatizado. Ademais, disporá de servizo de restauración no interior.
O Spring Festival 2015 é a primeira cita dun evento que ten vocación de continuidade e pretende seguir celebrando convocatorias na Feira Internacional de Galicia.
