Esta cita, organizada pola Asociación de Criadores de Cabalos Españois de Galicia (Accega), terá como eixo central a celebración do V Campionato de España Pura Raza Española-ANCCE de Galicia, o cal se desenvolverá durante os tres días. Unha proba morfofuncional na que se valorará tanto a morfoloxía dos exemplares como os seus movementos, e sobre a que o presidente de Accega, Manuel Benavides, destaca que “nesta edición mellora o nivel”, xa que si ben se situaba como o quinto maior concurso de alta competición nacional na súa modalidade, este ano, e á espera de que se pechen as inscricións, “estará entre os catro primeiros postos en canto a participación”. Unha posición que, indica, é froito dun “intenso traballo por para parte da Asociación e o imprescindible apoio da Fundación Semana Verde”
Unha alta concorrencia na que se rexistrarán exemplares procedentes de distintos puntos de España, moitos deles pertencentes a criadores de renome que, segundo o presidente de Accega, o converterán en “referente a nivel nacional”. Así mesmo, as súas cifras de participación volverán outorgarlle unha catalogación que permite que sexa clasificatorio para a final do Campionato do Mundo, a cal será en Sevilla no marco do Salón Internacional de Pura Raza Española (SICAB) entre o 19 e o 24 de novembro.
O concurso será emitido de novo en directo a través da web da Asociación Nacional de Criadores de Caballos de Pura Raza Española (ANCCE), entidade que volverá a estar presente cun stand promocional. Así mesmo, o sábado celebrarase unha cea na que se entregarán distincións a diversos gandeiros e persoas vencelladas ao mundo da pura raza española. Este ano cambiará o seu lugar de celebración e, por segunda vez na traxectoria do concurso, será no recinto, podendo participar quen o desexe, previo pago da entrada na secretaría de Equina.
Enganches e novo trofeo de doma clásica
Ademais do V Campionato de España Pura Raza Española-ANCCE de Galicia, Equina 2019 acollerá ao longo do sábado 22 de xuño dúas competicións de doma clásica que atraerán a binomios (cabalo e xinete ou amazona) galegos e tamén doutros puntos de España. Serán a XXI Copa Accega e, como novidade, o I Trofeo Xunta de Galicia – Medio Rural de Doma Clásica.
Por outra banda, o domingo pola mañá levarase a cabo un concurso clasificatorio para a Copa Galega de Enganches, organizada pola Federación Galega de Enganches. Unha actividade que volverá a Equina tras un ano sen celebrarse e que o fará aumentando considerablemente o seu número de participantes, os cales competirán nas modalidades Infantil, Veteranos, Sulky, Troncos, Limonera e Maratón. Así mesmo, estase estudiando a posibilidade de que antes da competición partes dos participantes percorran o casco urbano de Silleda para que os veciños podan observalos.
Unha cita para todo tipo de público
Equina, que xa comezará a súa actividade o día 20 de xuño coa recepción oficial de exemplares e as inspeccións veterinarias, supón, segundo Benavides un “compromiso co mundo do cabalo, os seus criadores e todos os afeccionados”, por iso a entrada seguirá sendo gratuíta e o evento tamén “se involucrará cos peregrinos a cabalo que durante os seus días de celebración pasen pola zona”, ofrecéndolles “unha atención especial”. Un aspecto sobre o que destaca que dende Accega estanse a preparar accións para futuras edicións de Equina de cara ao Xacobeo 2021.
Este evento converterá así ao recinto Feira Internacional de Galicia ABANCA nun espazo de referencia para o mundo do cabalo, algo que para Ricardo Durán, director do recinto, é “un eco da propia feira Abanca Semana Verde de Galicia, onde o ámbito ecuestre ten dende sempre unha gran importancia, tamén este ano”. Un evento, Equina, que ademais considera unha interesante oportunidade “non só para ver o espectáculo, senón para achegarse a estes animais, falar cos seus criadores e coñecer este mundo”, polo que anima a asistir a todo tipo de público, no só a profesionais.
